"పొగచుట్టకు, సతి మోవికి/తగనుచ్ఛిష్టత లేదని/ఖగవాహన తోడ కాలకంఠుడు పలికెన్/పొగ తాగని వాడు దున్నపోతై పుట్టున్" అంటాడు గురజాడ వారి కన్యాశుల్కంలో, గిరీశం తన శిష్యుడు వెంకటేశంతో. ఏదైనా దురలవాటు ఉన్నవారు దానిని సమర్థించుకోవడానికి గిరీశంలా పురాణాలను కూడా ఉటంకిస్తారు. ఎంత సమర్థించుకున్నా దురలవాటు ప్రమాదకరమైనదే!
పబ్లిక్ ప్లేస్లలో పొగతాగరాదు, పొగతాగుట నేరము లాంటి బోర్డులుంటాయి. సినిమాల్లో, ఏదైనా పాత్ర పొగతాగే సన్నివేశం వచ్చినప్పుడు పొగతాగుట ఆరోగ్యానికి హానికరం అని తెర దిగువన, ఎవరికీ కనబడకుండా, అతి చిన్న అక్షరాలతో చట్టబద్ధమైన హెచ్చరికను వేసి చేతులు దులుపుకుంటారు. మద్యం సేవించడం కంటే ఇదేమీ అంత ప్రమాదం కాదని వాదించే స్మోకింగ్ కింగ్స్ ఉన్నారండోయ్!
యద్భావం తద్భవతి అని మన పెద్దలు ఏనాడో చెప్పారు. పురాణ కాలక్షేపం అయిన తర్వా త భక్తులారా! భగవంతుడు మనకు చెవులు ఎందుకు ఇచ్చాడో అర్థమైంది కదా! అంటే ఒక ఆసామీ లేచి, నాకు బాగా అర్థమైందండి అన్నాడట వినయంగా. ఏమిటని అడిగితే, కాల్చే చుట్ట ఆరిపోతే చెవి సందున పెట్టుకోవడానికి అన్నాట్ట! అలా ఉంటుంది మనతోని.
1964లో విడుదలైన 'రాముడు- భీముడు' సినిమాలో రేలంగి-గిరిజల మీద ఒక పాట చిత్రీకరించారు దర్శకులు తాపీ చాణక్యగారు. పెండ్యాల వారు దానికి స్వరకర్త. సిగరెట్ తాగడాన్ని గ్లోరిఫై చేస్తూ రేలంగి 'పట్టుబట్టి ఒక దమ్ములాగితే స్వర్గానికి ఇది తొలిమెట్టు' అనీ, 'ఈ సిగిరెట్టుతో ఆంజనేయుడు లంకాదహనం చేశాడూ...' అనీ అంటే గిరిజ దానికి రిటార్టు ఇస్తుంది. 'కంపు కొట్టు ఈ సిగిరెట్టూ' అంటూ 'కడుపు నిండునా, కాలు నిండునా...' అనీ, ఇక ఆంజనేయుని లంకా దహనాన్ని 'ఎవడో కోతలు కోశాడూ' అనీ, 'ఊపిరి తిత్తుల క్యాన్సర్కిదియే కారణమన్నారు డాక్టర్లూ', అని తిప్పి కొడుతుంది. ఆనాటి సినిమా కాబట్టి సమాజానికి వ్యతిరేక సందేశం వెళ్ళకుండా జాగ్రత్త పడ్డారు. కళకు సామాజిక ప్రయోజనం ఉండాలనేది అప్పటి వారి లక్ష్యం. కాసులు రాల్చేదే కళ అనేది ఇప్పటి వారి గమ్యం. ఇలాంటి పాటలు రాయడంలో కొసరాజు రాఘవయ్య చౌదరిగారు చేయి తిరిగినవారు. పాడటంలో మాధవపెద్ది వారికి మంచి ప్రావీణ్యమున్నదనే గుర్తింపు ఉంది. ఆ రోజుల్లో సినిమా హాళ్ళలో, నిండా పొగ అలుముకొని ఉండేది. మా చిన్నప్పుడు దాన్ని అతి సహజంగా స్వీకరించేవాళ్ళం. కాలుతున్న సిగెరెట్ మీద ఇంటూ మార్క్ పెద్దగా వేసి పొగ తాగరాదు అనే స్లయిడ్ వేసేవారు మొక్కుబడిగా. ఇప్పుడా పరిస్థితి లేదు లెండి. పబ్లిక్ స్మోకింగ్ చాలా వరకూ తగ్గిపోయింది. కొన్ని చోట్ల స్మోకింగ్ జోన్స్ ఏర్పాటు చేసి పొగధీరులకు సౌకర్యం చేశారు.
పొగతాగటంలో కూడా స్టేటస్లు ఉన్నాయి. బీడీలు తాగడం లో-క్లాస్, పైప్ పీల్చడం హైక్లాస్, ఇక హుక్కా తాగడం రాజరికం. నేను పలాస ప్రభుత్వ కళాశాలలో ఇంగ్లీష్ లెక్చరర్గా పని చేసినప్పుడు నిష్ఠల సుబ్బారావుగారని మా ప్రిన్సిపాల్.. ఆయన రూమంతా చుట్టకంపు ఉండేది. కానీ ఆయన్నే మనగలం? 'బాస్ ఈజ్ ఆల్వేజ్ రైట్!'.
ప్యాసివ్ స్మోకింగ్ అసలు స్మోకింగ్ కన్నా ప్రమాదమట. అంటే మనం తాగకపోయినా, పక్కవాడు వదిలే పొగని విధిలేక పీల్చాల్సి రావడం. ఇంట్లో తండ్రి స్మోకర్ అయితే, భార్యకూ, పిల్లలకూ ఇది తప్పదు. కొన్ని సమాజాల్లో 'నెసెసరీ ఈవిల్స్' ఉంటాయి. స్మోకింగ్ కూడా అలాంటిదే. నాకు మటుకు అంత విచ్చలవిడిగా స్మోక్ చేయడం తగ్గిందనిపిస్తోంది. బహుశా 'పాజిటివ్ థింకింగ్' ఏమో? అదన్న మాట!
కథా నవలా సాహిత్యం - పద్యాలు - కవితలు - వ్యాసాలు - నాటికలు - కాలమ్స్ - సంగీతం - సినిమాలు - జీవితం!
Tuesday, May 14, 2024
ధూమపానోపాఖ్యానం! - దత్తవాక్కు - ఆంధ్రప్రభ 14 మే 2024
Sunday, May 12, 2024
Vote for NOTA - My Story in Women's Era April 2024 issue
My story, Vote for NOTA, on Indian electioneering process, told in lighter vein, has been published in Women's Era April 2024 issue.
Please click on the link, read and respond.
https://drive.google.com/file/d/1bDweJR6oOH6rzQU7VgQQbN_vKx_vZFMU/view?usp=sharing
'మహాప్రవాహం!'-26
రెండు నెలల్లోనే పుండరి సామి వాండ్లన్నయ్య పద్మనాబయ్య సామి అని వచ్చినాడనీ, శానా గొప్ప పండితుడనీ, బ్రమ్మాండంగా చేయిస్తాడనీ పేరు వచ్చింది టౌనులో.
పుండరితో పని లేకుండా డైరెక్టుగా సామి దగ్గరికి వచ్చి తమ కార్యక్రమాలను చేయించమని అడగబట్నారు జనము. ఉన్నోల్లనే గాకుండా, బీదోండ్ల యిండ్లకు గుడ్క బోయి చేయిస్తాడని, సంబావన ఇంత యియ్యాల్ల అని ఎవర్నీ అడగడని అనుకోబట్నారు.
https://sanchika.com/mahaapravaaham-pds-serial-26/
Tuesday, May 7, 2024
నరసింహస్వామిపై సుప్రసన్న కీర్తనలు 3
శ్రీమాన్ కోవెల సుప్రసన్నచార్యుల వారు, అశువుగా, శ్రీ వేల్పుకొండ నరసింహ స్వామి వారిపై, రచించిన కీర్తనలను, స్వరపరచి, పాడే భాగ్యం కలిగింది. ఇది మూడవది. వరుసగా ఇవి స్వాధ్యాయ యూ ట్యూబ్ లో వస్తాయి. 🙏
నరసింహస్వామిపై సుప్రసన్న కీర్తనలు 2
శ్రీమాన్ కోవెల సుప్రసన్నచార్యుల వారు, అశువుగా, శ్రీ వేల్పుకొండ నరసింహ స్వామి వారిపై, రచించిన కీర్తనలను, స్వరపరచి, పాడే భాగ్యం కలిగింది. ఇది రెండవది. వరుసగా ఇవి స్వాధ్యాయ యూ ట్యూబ్ లో వస్తాయి. 🙏
డా. రామడుగు వెంకటేశ్వర శర్మ గారి పద్యం
శ్రీయుత డా. రామడుగు వెంకటేశ్వర శర్మ గారు, నా పై, చి. కోవెల సంతోష్ పై వ్రాసి పంపిన ఆశీః పూర్వక పద్య ద్వయము. స్వర కల్పన, గానం, పరిచయం, చి. పాణ్యం శంకర్ కుమార శర్మ.
Saturday, May 4, 2024
ఎండలంటే నాకిష్టం - ఎందుకో తెలుసా?
అందరూ ఎండలు బాబోయ్ ఎండలు అంటుంటే.. ఈయన మాత్రం 'ఎండలకేం? బంగారుకొండలు' అంటున్నాడు. ఎందుకో.. ఈ కథ చదివి తెలుసుకోండి.
https://sanchika.com/endalakem-bangaarukondalu-pds-story/
'మహాప్రవాహం!'-25
కేదార తండ్రి వైపు ఆరాధనగా చూస్తూ ఉండిపోయినాడు. మీనాక్షమ్మ మాత్రం ఏమీ ఆశ్చర్యపడలేదు. “ఈరోజు కొత్తగా ఆయన నేర్చుకునింది ఏవి లేదురా కేదారా! ఆ పల్లెటూర్లో ఆయనకు తన విద్యత్తు నుపయోగించే అవసరం రాల్యా అంతే” అనింది. పద్మనాబయ్య చిరునవ్వుతో భార్యనూ కొడుకును చూసాడు. ఆ చూపుల్లో నిరహంకారం! అంతా ఆ పరాత్పరుని అనుగ్రహం తప్ప మరేమీ కాదనే ఒకానొక నిర్మమత్వం!
https://sanchika.com/mahaapravaaham-pds-serial-25/
పప్పు భోగారావు గారి గళంలో నా 'మన్నించు నాన్నా..' కథ
నేను రచించిన 'మన్నించు నాన్నా..' కథని శ్రీ పప్పు భోగారావు గారు కథాస్రవంతి అనే యూట్యూబ్ ఛానెల్లో వినసొంపుగా చదివారు.
ఈ కథ నా కథా సంకలనం 'దత్త కథాలహరి'లోనూ, డా. వైరాగ్యం ప్రభాకర్ గారి సంపాదకత్వంలో వెలువడిన 'కథల లోగిలి' అనే సంకలనంలోనూ ఉంది.
విని ఆనందించండి.
Wednesday, May 1, 2024
నా నాటిక 'యత్ర నార్యస్తు పూజ్యంతే'కు తృతీయ బహుమతి
విశాఖపట్టణానికి చెందిన 'తెలుగు కళాసమితి' వారు 2024 సంవత్సరానికి నిర్వహించిన 13వ కథా నాటిక, స్వీయ నాటిక రచనల పోటీలలో నా నాటిక 'యత్ర నార్యస్తు పూజ్యంతే'కు తృతీయ బహుమతి లభించింది. నిర్వాహకులకు ధన్యవాదాలు.
శతసహస్ర నరనారీ హృదయనేత్రి, భరత ధాత్రి!-1
సంచిక మాస పత్రికలో, శ్రీమతి మాలతీ చందూర్ నవల 'హృదయనేత్రి' పై నేను వ్రాసిన పరిశోధక గ్రంథం, ఈ నెల నుండి సీరియల్గా వస్తుంది. ఇది మొదటి భాగం. 🙏
~
మాలతీ చందూర్ గారు తన జడ్జిమెంట్సును మన మీద పాస్ చెయ్యరు. Objective గా సంఘటనలను వివరిస్తూ పోతారు. పాత్రచిత్రణ చేస్తారు. ఎవరితో సైడ్స్ తీసుకోరు. జాగ్రత్తగా చదివి, మనకుగా ఒక దృక్పథాన్ని ఏర్పరచుకునే బాధ్యత మనదే. నవల అంతా ఒక విధమైన non-attachment, రచయిత్రి పరంగా మనకు కనిపిస్తుంది. కాని అవసరం అయినచోట ఆమె కలం కరకుగా మారుతుంది.
~
పూర్తి రచనని సంచికలో చదవండి.
https://sanchika.com/shatasahasra-naranaaree-hrudayanetri-bharatadhaatri-1/