కం:
తీట గల భాగ్యశాలికి వాటముగా
గోళ్ళు ఉంటే వేణ్ణీళ్ళున్నన్
సాటియె సౌఖ్యము భువిలో
తీటే దేవేంద్ర పదవి తెలియుము నరుడా!
అన్నాడు వెనకటికి ఒక అధిక ప్రసంగి ఐన కవి.
తీటను దురద అని, జిల అని, దూల అని కూడా అంటారు.
రాయలసీమలో మేం దీన్ని నవ్వ అంటాం, ఇంగ్లీషు వాడు దీన్ని ఇచ్చింగ్ సెన్సేషన్ అన్నాడు. రూపాలు వేరైనా పరమాత్మ ఒక్కడే కదా! అందుకే, ఏకం సత్ విప్రాః బహుథా వదన్తి అంటూ శాస్త్రాలు ఘోషిస్తున్నాయి. మాటలు వేరైనా అరిస్టాటిల్ గారు చెప్పినట్లు దాని ఇంపోర్టు (పరమార్థం) ఒక్కటే. చిన్నప్పుడు నేను ప్రతిదానికీ ఆరాట పడిపోతుంటే మా అమ్మ 'ఈ వెధవకు అతి ఉలగరం!' అని ప్రేమగా విసుక్కునేది. అమ్మలెప్పుడూ ప్రేమగానే విసుక్కుంటారు. కానీ, భార్యలు మాత్రం నిజంగానే విసుక్కుంటారు సుమండీ. ఉబలాటం అనే పదం కూడా దురదకు సమానార్ధకమే తెలుసాండీ!
దురద గుండాకు అని ప్రకృతిలో ఒక దాన్ని దేవుడు సృష్టించాడు. అది పూలు పూయదు. కాయలు కాయదు. కానీ, దాని కొమ్మతో మేని మీద నిమిరితే, ఒళ్ళంతా విపరీతమైన దురదలు పుట్టుకొస్తాయి. మన పాత జానపద సినిమాల్లో ఎన్టీఆర్ అంజిగాడితో కలిసి విలన్లు రాజనాలనో, సత్యనారాయణనో దురదగుండాకు పూసి ఏడిపిస్తుంటారు మారు వేషాలలో! హాల్లోని ప్రేక్షకులందరికీ మారు వేషగాళ్ళు ఫలానా అని తెలుసు. విలన్లకు తప్ప. అదే చలనచిత్ర చమత్కారమంటే!
అసలు విషయం వదిలేసి ఎక్కడికో... వెళ్ళిపోయాను. ఈ రోజు నేను చెప్పదల్చుకున్నది శరీరం మీద వచ్చే దురద గురించి కాదండోయ్! మనసుల్లో వచ్చే దురద గురించి. మొదటిది కాసేపు గోక్కుంటే తగ్గుతుంది. గోక్కోవడం వేరు, గోకించుకోవడం వేరు. మీకు తెలియంది కాదు, వెనకటికి ఒకాయన కొడుకుని అడిగాడట జంధ్యం వల్ల ప్రయోజనం ఏమని? వీపు గోక్కోవడానికి భేషుగ్గా పని చేస్తుంది పితాశ్రీ! అని చెప్పాడట ఆ పుత్ర రత్నం. చక్కగా రోజూ సంధ్య వార్చుకునే శ్రోత్రీయులు నన్ను క్షమించాలి! పెళ్ళితో పాటు వడుగు చేసుకునే నవయువకులు, సంధ్య అంటే అదేదో అమ్మాయి పేరనుకునే నాగరికులకు మాత్రం నో అపాలజీ!! ఇంగ్లీషు వారికి 'సెవెన్ ఇయర్స్ ఇచ్' అని ఉంది లెండి. పెళ్ళయిన ఏడేళ్ళకు భార్యంటే మొహం మొత్తి పక్కచూపులు చూడటాన్ని అలా అంటారు. అదేం పోయే కాలం అని
విస్తుపోతున్నారా? మనలాగ జీవితాంతం ఒక్కరికే కట్టుబడే పవిత్ర వివాహ బంధం కాదు వాళ్ళది. నాతి చరామిలూ, నాతిచరితవ్యాలూ వాళ్ళకు ఉండవు. 'సెవెన్ ఇయర్స్ ఇచ్' మీద చాలా జోక్స్ ఉన్నాయి. నెట్లో చదివి ఎంజాయ్ చేయండి.
కీర్తి కండూతి కూడా దురద కిందికే వస్తుంది. కండూతి అనేది సంస్కృత పదం. ఎప్పుడూ వార్తల్లో ఉండాలనుకోవడం, దాని కోసం మీడియాలో అవాకులూ, చవాకులూ వాగడం, డబ్బులిచ్చి సన్మానాలు చేయించుకోవడం, డబ్బులిచ్చి పిహెచ్.డి థీసిస్లు రాయించుకోవడం - ఇలాంటివన్నీ అవే.
షాపింగ్‍లు చేసి మాల్స్ వాళ్ళను పోషించడం కూడా ఒక విధమైన తీటే. ఆ పేరుతో అనవసరమైనవన్నీ వాళ్ళు అమ్ముతారు. కొనే వాళ్ళకు ఇంగితం ఉండాలి కదా! దీన్ని కన్యూమరిజం ఇచ్ అని అందామా? ఇఎమ్ఐల కల్చర్ వచ్చి ఈ దురద ఇంకా పెరిగింది. వీకెండ్ ఔటింగ్‍లు సరేసరి! వీటి వల్ల టెక్కీల పర్సులు weakened అవుతూ ఉంటాయి. బంగారంలా ఉన్న కారును ప్రతి మూడు సంవత్సరాలకు మార్చి, ఎక్స్ఛేంజ్ ఆఫర్‍లో కొత్తది తీసుకోవడం ఒక దురద.
జీవితాంతం కార్ లోన్ తీరుస్తుంటే కాని వారికి తోచదు. వారి డబ్బు వారిష్టం. నీకెందుకోయ్? అంటున్నారా? నాదీ ఒక రకమైన దురదేనండి!
దూల అనే దొకటుంది. మన కొత్త సినిమాల్లో రవితేజ, బ్రహ్మానందం లాంటి వారు దూల తీరిందా? అంటూ హాస్యాన్ని పండిస్తుంటారు. బాగా శాస్త్రి అయిందిలే! అని కవి హృదయం. ఇక సెల్లు దూల అని ఒకటి వచ్చింది. తనకు తెలిసినది అవతల వారికి తెలియనిది (ముఖ్యంగా నెగెటివ్ అంశాలు) వెంటనే ఫోన్ చేసి చెబితే గాని ఆ దూల తీరదు. కాళిదాసు కవిత్వం కొంత, నా పైత్యం కొంత అన్నట్టుగా ఈయన కల్పనా చాతుర్యం కొంత జోడించి, వండి వారిస్తే గాని కడుపుబ్బు తగ్గదు. "నీకు తెలుసా వదినా! ఆ త్రిపుర సుందరి కొడుక్కి ఆల్రెడీ పెళ్ళయి, రెండేళ్ళ కొడుకున్నాడట. అమెరికాలో! కోడలు కిరస్తానం పిల్లట! ఈమేమో మా వాడికి సంబంధాలు చూస్తున్నామని గొప్పలు చెబుతూ ఉంటుంది". వాళ్ళ కుటుంబం తిప్పలు వాళ్ళు పడతారు! ఈమెకెందుకు చెప్పండి! ఈ 'అట' లు చాలా థ్రిల్‌ను కలిగిస్తాయి. చెప్పేవారికి, వినేవారికీ కూడా! దీన్ని సందేశ దూల అనవచ్చు.
ఉచిత సలహాలు ఇవ్వడం కూడా అలాంటిదే.! నిన్నెవడడిగాడు? అంటే సరి... పరువు పోతుంది. దూల అనేదే లేనివారు సమాజంలో ఉండరు. దాన్ని నియంత్రించుకోవడంలోనే వివేకం ఉంది. పరస్పర ప్రశంసలు కూడాఈ కోవకే వస్తాయి. 'నా వీపు నీవు గోకు. నీ వీపు నేను గోకుతా!' అన్నట్టు అవి సుఖంగా ఉంటాయి. అదన్న మాట!
.jpeg)
